நான் தமிழனா? இல்ல, டமிலனா?

          

          ஒரு கட்டுரை எழுத நினைக்கும் போது நாம் என்ன செய்வோம்? நமக்கு தெரிந்த விஷங்களை எழுதுவதோடு மட்டும் இல்லாமல், நூலகம் சென்று தேடி குறிப்புகள் எடுத்து கட்டுரையை உருவாக்குவோம். இன்றைய காலகட்டத்தில் நூலகமே இணையத்தில் வந்துவிட்டது. நமக்கு தேவையான கட்டுரை குறிப்புகளை இணையத்தில் தேடுவது தவறா? நமது பாரம்பரிய பண்டிகைகள் பற்றியும் நாம் எல்லாம் தெரிந்து வைத்திருப்பது இல்லை. 

       அப்படியே தெரிந்து வைத்திருந்தாலும் மேலோட்டமான வரலாறே அறிந்து வைத்திருப்போம். ஆழமான வரலாறு வேண்டுமானால் நூலகம் செல்லலாம், அல்லது பெரியவர்களிடம் கேட்கலாம். இன்று அதையே இணையத்தில் தேடுகிறோம். 

        சரியான குறிச்சொல்லை கொடுத்தால் ஆயிரக்கணக்கான குறிப்புகள் இணையத்தில் கிடைக்கும்,. அவற்றில் எது நமக்கு பயன்படும் வகையில் இருக்கிறது என்பதை நாம் முடிவு செய்து அதை குறிப்பெடுத்துக் கொள்கிறோம். 

        நாம் எந்த சமயத்தை சார்ந்தவராக இருந்தாலும், அவர்களது சமயம் சார்ந்த புத்தகங்களை முழுமையாக அறிந்து வைத்திருக்கும் அவசியம் இருக்கா? இங்கே நான் குறிப்பிட விரும்புவது என்னவெனில் அனைவரும் அட்டை டூ அட்டை அறிந்து வைத்திருக்க மாட்டார்கள் (ஒரு சிலரை தவிர). முக்கியமான வரிகளை மட்டுமே பெரும்பாலோனோர் அறிந்து வைத்திருப்பார்கள். அவைகள் எல்லோராலும் உச்சரிக்கப்படும் முக்கியமான வரிகளாக இருந்திருக்கலாம்.

        அதே போல அவர்களது விழாக்கள் பற்றிய முழுமையான வரலாறும் குழந்தை பிறந்த உடனேயே எல்லோருக்கும் தெரிந்து விடாது. அவர்கள் வளர வளர பெரியவர்கள் சொல்லக் கேட்டு, புத்தகங்கள் வாசித்து, அனுபவ பூர்வமாக அறிந்து வந்திருந்தால் ஓரளவு முழுமையான தெரிந்து கொள்ளலாம். 

        இன்றோ இயந்திர உலகில் இயந்திரத்தனமான வாழ்க்கைக்கு நாம் பழகி விட்டோம். இந்நிலையில் இன்றைய குழந்தைகளுக்கு நாம் சொல்லிக் கொடுக்க நமக்கு தெரிந்த விசயத்தை மட்டும் சொல்லாமல் நாமளே அக்கறை எடுத்து அந்த வரலாற்றை ஓரளவு அறிந்து சொல்வதில் தவறில்லையே. இது ஒன்றும் அவலமான நிலை இல்லையே. 

      எதிர்கால சந்ததியினருக்கு வழிகாட்டியாக நாம் தான் உள்ளோம். அவர்கள் நம்மை சார்ந்தே இருக்கிறார்கள். அவர்களுக்காக நாம் எங்கே வேண்டுமானாலும் தேடலாம். ஆங்கிலம், தமிழ் என்ற பாகுபாடு இல்லாமல் எந்த புத்தகங்களும் வாசிக்கலாம். அடுத்தவரிடம் கேட்டு சொல்லலாம். இது கேவலமான நிலை இல்லையே. இன்றைய தொழில்நுட்ப உலகில் இணைய தேடுதலும் அவசியமே என்பது என் கருத்து. இத்தகைய தேடுதலினால் நான் "தமிழன்" இல்லாமல் "டமிலன்" ஆகிவிட மாட்டேன்.

கொசுறு: மேற்கண்டவை என் சொந்த கருத்துகளே,